2019-09-27 | Batzar Orokorra eta Irekia

Urte honetako maiatzaren 26an batzar orokor eta ireki bat burutu genuen. Horren ondoren, ekainaren 21an, Talde Eragilea osatzeko bilera egin genuen (hemen bilera horren akta). Eta datorren ostiralean orain arte egindako lanen nondik norakoak aurkeztu nahi dizkizuegu; horretarako, batzar orokor baten deia luzatzen dizuegu.

Herri Antzerkia Elkartea
Batzar Orokorra

• Non: Goñi Portalen

• Noiz: Irailaren 27an, ostirala, 19:00etan

• Gaiak:

• Elkarte berriaz informazioa eman
• Talde Eragilea aurkeztu
• Udaletako informazioa eman
• Hurrengo antzerkiaren egitasmoa: antolamendua, agenda, webgunea, komunikazioa, proposamenak
• Obra berriaren aurkezpena

2019-06-21 | Talde Eragilearen akta

ANTZERKI PROIEKTUAREN TALDE ERAGILEAREN AKTA
Danontzat Gaztetxea, 2019ko ekainaren 21a

---

Bilerara etorriak

• Joseba Arruzazabala
• Adelaida Umaran
• Jaio de la Puerta
• Jesus Romo
• Alex Igartua
• Jokin de Pedro
• Iñaki Lagos
• Amaia Garagorri
• Matere Pascual
• Iñaki Ortigosa
• Beñat Larrinaga

Horiez gainera, bilerara ezin etorria jakinarazi, baina lanerako prest azaldu dira:

•  Igone de Diego
•  Edu Zabala
•  Brenda Benito
•  Maixol Bilbao

---

Kontrolpean ditugun arloak

Iazko arlo batzuen ardura hartu zutenek horretan jarraitzeko prestutasuna agertu dute:

1. Zuzendaritza artistikoa: Alex Ygartua.
2. Zuzendaritza musikala: Iñaki Lagos.
3. Testu arduraduna: Jokin de Pedro.
4. Jantzi arduradunak: Gotzone Butron eta Estitxu Garaizar.
5. Barne komunikazioa: Jesus Romo. 

Jaio de la Puertari proposatu zaio “Kanpo komunikazioa” (difusioa, propaganda...) arloaz arduratzea, onartu duelarik. 

Maixol Bilbao prest dago kontuak eramateko.

---

Gainerako arloak

Gainerako arloen banaketa zehatzik ez da egin, baina ez da zailtasunik antzeman denon artean lana egokiro banatzeko.

---

Testu berri bat labean

Jokin de Pedrok esan du testu berriarekin lanean dabilela eta uda barruan kopia bana zabalduko duela Talde Eragileko lagunen artean, iritzia edota oniritzia emateko. XV-XVI. mendeetan kokaturiko antzezlan historikoa da, butroetarren leinuaren gorabeherak dela gai nagusia.

---

Hurrengo urratsa

Gaur eratu den Talde Eragile honek dei egiten du irailaren 27an, ostirala, Goñi Portalean (hau baietsi egingo da) izango den BATZAR OROKORRERA. Bilera hori irekia izango da, noski, eta Talde Eragileak informazio berria emango du eta 2020rako antzezlan berriaren testua aurkeztuko da.

Beste barik, eta bertaratu diren guztiei eskerrak emanez, amaia eman zaio bilerari.

                                                     Plentzia, 2019ko ekainaren 21ean

---

ZURE LAGUNTZA ESKERTZEN DIZUGU

Proiektu hau irekia delako Talde Eragilea ez dago itxita eta zure laguntza ongi etorria da.

2019-05-26 | Batzar Nagusiaren akta

ANTZERKI TALDEAREN BATZAR NAGUSIAREN AKTA
Danontzat Gaztetxea, 2019ko maiatzaren 24a

---

Bilerara etorriak

Estitxu, Diana, Ana L., Edu, Joseba, Josune, Adelaida, Jon Mikel, Jaio, Jesus, Jokin, Iñaki L., Beñat, Igone eta Alex.


Agurra eta hasiera

Batzar Nagusiari hasiera emanez, orain arteko batzorde antolatzaileak gaiorden hau proposatu du:

1. Anton Garaiko ekimenaren batzorde antolatzaileak egiten duen balantzea.
2. Orain arteko batzorde antolatzaileak egiten dotuen proposamenak.
3. Gainerako partaideen ekarpenak eta iruzkinak. 
4. Erabakiak. 

---

1. ANTON GARAIKO: BALANTZEA, BATZORDEAK EGINIK

Orain arteko batzorde antolatzaileak iazko proiektuaren balantzea egin du, honako puntuotan xehetuz:

Alderdi onak:

• Aurreko proiektuan (Plasentzia 1577) baino jende gehiago guregana bildu izana.
• Gazteak erakarri ahal izan dira eta gustura aritu dira Taldean.
• Musikaren aldetik aberatsagoa eta landuagoa izan da.
• Gorlizeko Abesbatzaren parte-hartzea.
• Jantzien diseinurako arduraduna eta joskile taldea izan dira.
• Eszenografia: taldea sortu da, eta beren-beregiko diseinuak egin dira agerraldi zenbaitetarako.
• Ikuskizunaren maila, oro har, nabarmen goratu da.
• Gorlizen ere antzeztu izana.
• Euskeraz egindako prozesua eta euskeraz antzeztua izan da. Guretzat oso estimagarria.
• Proiektuko taldean, parte-hartzaileen arteko batasuna, konplizitatea eta giro ona izan dugu, entseguen hasieratik antzezpenen ondoko ospakizunetara arte.

Alderdi ez hain onak, edo hobetu beharrekoak:

• Antolatzaile gutxiegi, tamainako lana egiteko.
• Antzezlan bat urtero-urtero taularatzea —bi emanaldi, gainera— zama bihur liteke (edo bihurtu da) eta higadura, nekea sortu.

---

2. BATZORDEAREN PROPOSAMENAK

Aurrera egiteko batzorde antolatzaileak ondoko proposamen hauek egiten ditu:

• Zalantza barik, Antzerki Taldeak proiektu gehiago egitearen alde gaude batzordekoak, eta bai horretarako geure lana eta ahalegina egiteko prest ere.
• Antzerki talde sendo, egonkor eta iraunkor bat sortzea, herriarentzat dakartzan onurak ikusita.
• Lortu dugun mailari eutsi egin beharko genioke.
• Urte birik behin egitea, ez urtero.
• Jarraitzea prozesu guztia euskeraz egiten.
• Talde eragile zabal bat egitea, ardurak eta lanak egokiago partekatzeko.
• Epe bat ematea jendeak parte-hartzea bermatzeko.
• Ekaina amaitu baino lehen Talde Eragile berriaren lehen bilera egin: Zuzendaritza Talde berri horrek hartuko ditu lehen erabakiak: barne antolamendua, lan-arduren banaketa, agenda, epeak, testua...

Batzorde antolatzaileren ustez, hauek dira banatu beharreko ARDURAK:

• Zuzendaritza Artistikoa.
• Zuzendaritza Musikala.
• Testu arduraduna.
• Barrurako komunikazioa.
• Kanporako komunikazioa.
• Harremanak Instituzioekin.
• Diseinu grafikoa.
• Diruzaintza.
• Jantziak.
• Atrezzoa.
• Errejidoreak.
• Argazkilaritza.

---

3. GAINERAKO PARTAIDEEN EKARPENAK ETA IRUZKINAK

Jarraian egindako iruzkinen zerrenda bat ematen da:

• Estitxu: Aurreko obran pertsonaia femenino gutxi izan zen. Lan egiterakoan, balorazioak egiterakoan eta erabakiak hartzekoan profil desberdinak daude, adibidez hiru hauek: antzezlearena, antolatzailearena eta musikoarena.
• Igone: Antzezpena egiteko data dela eta, irakaskuntzan ari den jendeari tentsioa sortzen dio. Kalean egiten den antzezpena izanik, eguraldiak eragina zuzena du eta leiho ziurrena maiatzetik urrira da. Maiatzak duen alde txarra da gazteak ezin erakar daitezkeela azterketa garaian daudelako.
• Beñat: Asanblada berandu egin da. Orain arte, hiru aldiz jarraian, antzezpena urtero egin da. Produkzioaren maila jaitsi egin beharko litzateke. KEA elkartearen beharra edo komenientzia aipatzen da.
• Iñaki L.: KEA elkartea zer den eta dituen helburuak azaltzen ditu.
• Joseba: Entseguak ez ziren behar zen seriotasunarekin hartu. Ondorioz, antzezpenaren egunera heldutasun eta ziurtasun gabe heldu ginen. Gaurko asanbladatik abiatuta beste asanblada bat egitea komeniko litzateke. 
• Josune: Proposamen bezala: "La partera de Gaminiz egin dezagun 2019an". Euskerara moldatzea litzateke lanik eskergena, eta gogarazten da 2017an antzeztu zenean entseguekin irailean hasi ginela, artean batere esperientziarik ez geneukala.

---

4. ERABAKIAK

Iritzi horiek entzun, eztabaidatu eta trukatu ondoren, gutxienezko erabaki hauetara iritsi gara:

1. Ekainaren 21ean, arratsaldeko 7etan, Gaztetxean, bilera bat egingo da Talde Eragile bat osatzeko. Bien bitartean, eta bilerara itxaron gabe, oraingo batzordeari jakinaraz dakioke Taldean lan egiteko gogoa; osterantzean, 21eko bileran bertan.
2. Talde Eragileak hasierako aldian hartuko dituen erabakiak eta mamituko dituen proposamenak Batzar Orokor batean eztabaidatuko dira, irailean.

Beste barik, eta bertaratu diren guztiei eskerrak emanez, amaia eman zaio aurkezpen bilerari.

                                                     Plentzia, 2019ko maiatzaren 26an

2019-05-24 | Batzar Orokorra eta Irekia

Batzar Orokorra eta Irekia: Maiatzaren 24an, ostirala, arratsaldeko 19:30etan Gaztetxean.

Anton Garaiko kortsarioaren historia

Plentzia Telebistak grabatutako bideoa. Eskerrrik asko Ptb!

Anton Garaiko: Azken perediküa

Zuberoako pastoraletako bukaerako kantuari "Azken perediküa" esaten zaio, eta horren bitartez ikuslegoari eskerrak ematen zaizkio. Bideo honetan Peru de Pedrok azken perediküa kantantzen du:

Anton Garaiko: Lehen perediküa

Zuberoako pastoraletako hasierako kantuari "Lehen perediküa" esaten zaio. Kantu horren bitartez ikuslegoa agurtzeaz gain, obraren nondik norakoak gain-gainetik azaltzen dira.

"Anton Garaiko kortsarioaren historia" antzezlanaren idazleak, Jokin de Pedrok, lehen perediküa kantantzen du bideo honetan:

Gorlizko emanaldiaren argazkiak

Albuma ikusteko irudiaren gainean klik egin.

Antonen bertso jarriak Gorlizen

ANTON GARAIKOAREN BERTSOAK, TRIPULAZIOARI JARRIAK

                                Egilea: Iñaki Ortigosa (Anton helduaroan)

                                Doinua: Kapitan Pilotu

1.

Joskileen kuadrilla,

langile prestuak

egoki eta polito

jantzi gaituztenak,

musikari fin denak,

Lirain abesbatza:

Eskifaia haundi honekin

garaile irten gara!                                          Guztiok:

Hau da gure eskifaia!                           Hau da gure eskifaia !

Honi zor zaio errespetua!                     Errespetua !

Hau da gure eskifaia!                           Hau da gure eskifaia !

Gorde egiozue errespetua!                   Errespetua !

Horrela zenbait antzezlan...                 Bonbilun bonbilun behera !

Geroan ere egin ahalko da!                  Bonbilun bat eta bonbilun bi !!

                                                             Agur eta ohore lantaldeari !!

2.

Nabigazio luzea

burutu duguna,

hamaika entsegu eta

lan eta ahaleginak !

Itsaso harro batean

hori ausardia!

Altxor eder batekin

etxeratzen gara!!                                            Guztiok:

Hau da balentria haundia!                     Hau da balentria haundia !

Elkarrekin egin duguna!                        Egin duguna !

Hau da balentria haundia!                     Hau da balentria haundia !

Elkarrekin egin duguna!                       Egin duguna !

Honelako gogo-ekimenez...                  Bonbilun bonbilun behera !

Iraungo ahal dugu zenbait urtez!          Bonbilun bat eta bonbilun bi !!

                                                              Zorionak emaizkiogu elkarri!!

Gorlizko entsegu orokorraren argazkiak

Albuma ikusteko irudiaren gainean klik egin.

2018-10-26, Deia

Hitzordua: Gorlizko entsegu orokorra

Bihar Gorlizen dena egingo dugu, entsegu orokorra eta emanaldia bera. Hauxe dugu hitzordua, lan handia dagoelako garaiz iritsi:

• Urriaren 26an, ostirala.
• Arratsaldeko 5etan.
• Gorlizko Eleiz Enparantzan.
• Aktoreak eta figuranteak.

Anton Garaiko: promoziorako bideo laburra

ADI! Gorlizko emanaldian aldaketak

Eguraldi txarra datorrelako Gorlizko emanaldia aurreratzea erabaki dugu. Egun eta ordu berria hau izango da:

• Urriaren 26an, ostirala.
• Arratsaldeko 8:30etan.
• Gorlizko Eleiz Enparantzan.

Gorlizko emanaldiaren data aldaketa

2018-10-22, Onda Vasca

Onda Vasca irratian Jaio de la Puerta gure lagunak eskerrak ematen.

Elkarrizketa entzuteko irudiaren gainean klikatu edo hemen klik egin.

Liburuxka

ANTON GARAIKO (liburuxka).pdf

Plentziako emanaldiaren argazkiak eta bideoak

Albuma ikusteko irudiaren gainean klik egin.

Antonen bertso jarriak Plentzian

ANTON GARAIKOAREN BERTSOAK, KAPITAINEI JARRIAK

                                Egilea: Iñaki Ortigosa (Anton helduaroan)

                                Doinua: Kapitan Pilotu

1.

Gorliz-Plentzian badugu

letragile fin bat

itzulpenak, bertsoak,

ikerketa lanak,

antzerki pieza ederrak

ontzen dituena:

idazle nekaezina

da Jokin gurea.                                                          Guztiok:

Hau da kapitan pilotu!                        Hau da kapitan pilotu !

Honi behar zaio obeditu!                    Obeditu !

Hau da kapitan pilotu!                        Hau da kapitan pilotu !

Honi behar zaio obeditu!                    Obeditu !

Horrela zenbait istorio...                     Bonbilun bonbilun behera !

Buruan sortuko zaio!                          Bonbilun bat eta bonbilun bi !!

                                                            Men egin diezaiogun Jokini !!

2.

Herri honetan bertan

batetik bestera

antzerki, telebistan...

Alex dabil saltsan:

kaosaren erdian

lasai dagoela

okerra den guztia

zuzentzen trebea.                                            Guztiok:

Hau da kapitan pilotu!                        Hau da kapitan pilotu !

Honi behar zaio obeditu!                    Obeditu !

Hau da kapitan pilotu!                        Hau da kapitan pilotu !

Honi behar zaio obeditu!                    Obeditu !

Horrela zenbait zuzenketa...               Bonbilun bonbilun behera !

Buruan sortuko zaio eta!                    Bonbilun bat eta bonbilun bi !!

                                                           Men egin diezaiogun Alexi !!

3.

Kulturgintza inoiz bada

gure herriotan

kulturgile sendoei

esker izango da:

musikari, irakasle,

etsitzeko ezinez

horretan dugu Iñaki

beti ekiteko prest                                            Guztiok:

Hau da kapitan pilotu!                        Hau da kapitan pilotu !

Honi behar zaio obeditu!                    Obeditu !

Hau da kapitan pilotu!                        Hau da kapitan pilotu !

Honi behar zaio obeditu!                    Obeditu !

Horrela zenbait kontzertu...                Bonbilun bonbilun behera !

Buruan ahalko zaio sortu!                  Bonbilun bat eta bonbilun bi !!

                                                           Men egin diezaiogun Iñakiri !!

Plentziako entsegu orokorraren argazkiak eta bideoak

Albuma ikusteko irudiaren gainean klik egin.